АЛТАЙ ТИЛДИҤ КӰНИНДЕ АЛТАЙ КАЛЫГЫСТЫ УЧУРЛУ БАЙРАМЛА УТКУЙДЫС! - НИИ алтаистики им. С. С. Суразакова

АЛТАЙ ТИЛДИҤ КӰНИНДЕ АЛТАЙ КАЛЫГЫСТЫ УЧУРЛУ БАЙРАМЛА УТКУЙДЫС!

Категория: Новости
Опубликовано: 20.10.2023, 09:58
Просмотров: 397

АЛТАЙ ТИЛДИҤ КӰНИНДЕ АЛТАЙ КАЛЫГЫСТЫ  УЧУРЛУ БАЙРАМЛА УТКУЙДЫС!

Алтай тил – ол калыктыҥ байлыгы, ада-ӧбӧкӧлӧрдиҥ арттырган энчизи. Тӧрӧл тилдиҥ кажы ла сӧзи кижиниҥ кӧксине јуук ла кару.
Алтай тил эҥ озогы ла јараш тилдердиҥ бирӱзи. Бойыныҥ аҥылузын ла байлыгын ол чактар ӧткӱре јылыйтпаган. Агын суудый шоркырап аккан алтай тилисле канча ӱйелер куучындажып, санаа-кӱӱнин айдыжып јӱрген. Бӱгӱн Алтай тилдиҥ кӱни ӱлӱрген айдыҥ 20-чи кӱнинде аҥылу темдектелип турганы учурлу ла јаан байрам.

С.С. Суразаковтыҥ адыла адалган алтаистиканыҥ билим-шиҥжӱлӱк институдыныҥ билимчилери алтай тилдиҥ курч сурактарын шиҥдеп, оныҥ чӱмдӱ јажыттарын табып, бу ишти бӱгӱнге јетире эрчимдӱ улалтат.

Алтай тилисти чеберлеп, оныла куучындажып, тилдер ортодо кӧдӱрӱп, кайда да јӱрзебис, оныҥ јаражыла оморкоп јӱрели! Чактардаҥ келген тӧрӧл тилис јаранып ӧссин, байызын, ӱргӱлјиге улалзын!

Институттыҥ ӧмӧлиги